Saturday, December 27, 2014

Sri Lakshmi Narasimha Swamy Temple, Guntur

                      శ్రీ లక్ష్మీ నారసింహ స్వామి ఆలయం, గుంటూరు 

సర్వ లోక రక్షకునిగా పేర్కొనే శ్రీ మన్నారాయణుని దశావతారాలలో తొలి నాలుగు అవతారాలు సంకల్ప మాత్రాన అవతరించినవి.
జననీజనకులు లేకుండా జన్మించిన "సద్యోజాత రూపాలు".
వీటిల్లో అత్యంత ప్రముఖమైనది శ్రీ నారసింహ అవతారం.
దుష్ట సంహరునిగా, భక్త వరదునిగా,అపమృత్యు భయాన్ని తొలిగించేవానిగా, కోరిన కోర్కెలు కురిపించే కల్పతరువుగా ఈ స్వామి ప్రసిద్దుడు. 



శ్రీ నరసింహునికి మన రాష్ట్రంలో పెక్కు ప్రసిద్ద ఆలయాలున్నాయి. 
చరిత్రలో సముచిత స్థానం ఉన్నా స్థానికంగా మాత్రమే గుర్తింపు ఉన్న ఒక నారసింహ ఆలయం ఒకటి గుంటూరు పట్టణంలో నెలకొని ఉన్నది.  


ఆరువందల యాభై సంవత్సరాల క్రిందట స్థానిక భక్తునికి స్వప్న దర్శనమిచ్చిన స్వామి "తానొక చెట్టు తొర్రలో ఉన్నాను" అని తెలిపారట. 
 ఆ భక్తుడు ప్రాంత పాలకులైన కొండవీటి రెడ్డి రాజుకు విషయం విన్నవించుకొన్నారు. 



రాజాదేశం మేరకు సాగిన అన్వేషణలో శ్రీ లక్ష్మీ నరసింహ స్వామి విగ్రహం ఒక వట వృక్షం తొర్రలో లభించినది. 
తమ అదృష్టానికి సంతసించిన రాజు ఇక్కడ చక్కని ఆలయాన్ని నిర్మించి, నిర్వహణ నిమిత్తం అనేక భూరి విరాళాలను ఇచ్చారు. 
ఈ విషయం తెలిపే శాసనం ఒకటి ప్రాంగణంలోని ఉత్సవ మండప స్థంభం మీద చెక్కబడి ఉన్నది.   




నాటి నుండి నేటి వరకు నిత్య పూజలు జరుగుతున్న ఈ ఆలయం అనేక మంది భక్తుల సహాయ సహకారాలతో దినదినాభివృద్ది చెందుతోంది.




ద్వజస్థంభం వద్ద సహజంగా గరుత్మంతుడు కొలువై ఉంటాడు. 
కానీ ఈ ఆలయంలో శ్రీ ఆంజనేయుడు, శ్రీ వినతా సుతుడు కొలువై కనపడటం ఒక విశేషంగా చెప్పుకోవాలి. 



తూర్పు ముఖంగా ఉండే ప్రధాన ద్వారానికి అయిదు అంతస్తుల సుందర శిల్పాలతో కూడిన రాజ గోపురం నిర్మించబడినది.
భాగవత, రామాయణ ఘట్టాలను చక్కగా మలచారు.

ప్రాంగణలో మండపం, ఎదురుగా ద్వజస్థంభం, బలి పీఠం కనపడతాయి.
పక్కన ఎత్తైన కళ్యాణ మండపం కూడా ఉంటుంది.
సుందర వర్ణమయ రూపాలతో శోభాయమానంగా కనిపిస్తుందీ ఆలయం.
ముఖమండప పై భాగాన దశావతార రూపాలను నిలిపారు.
శ్రీ దేవి భూదేవి సమేత శ్రీ మహా విష్ణువు, శ్రీ వేంకటేశ్వర స్వామి, ఆళ్వార్లు కూడా ఇక్కడ దర్శన మిస్తారు.


ప్రదక్షణ పధంలో వాయువ్య మూలలో పురాణ కాలక్షేపాలకు వేదిక నిర్మించబడినది. 
గోడలపైన అనేక శ్లోకాలను చెక్కిన రాళ్ళను భక్తుల సౌలభ్యం కొరకు ఉంచారు. 
ఉత్తరంలో వైకుంఠ ద్వారం. 











ఆస్థాన మండపం లోని ఏకశిల స్థంభాలు ఆలయ కాలాన్ని చెప్పకనే చెబుతాయి. 
గర్భాలయంలో వామాంకం మీద శ్రీ లక్ష్మీ అమ్మవారితో కలిసి ఉపస్థిత భంగిమలో రమణీయ అలంకారంలో శ్రీ నారసింహ స్వామి ప్రసన్న రూపంలో దర్శనమిస్తారు. 
పక్కనే ఉన్న ఉపాలయలలొ శ్రీ రాజ్య లక్ష్మి అమ్మవారు కొలువై ఉంటారు. 
వివాహ మరియు ఉద్యోగ సంబంధిత ఆటంకాలను తొలగించే దానిగా ఈ దేవి ప్రసిద్ది. 
మరో ఉపాలయంలో శ్రీ ఆండాళ్ ఉంటారు. ధనుర్మాసం లో విశేష పూజలు నిర్వహిస్తారు. 







నియమంగా నిర్ణయించిన నిత్య పూజలను, కైంకర్యలను జరుపుతారు. 
చైత్ర మాసంలో బ్రహోత్సవాలు, శ్రావణం లో పవిత్రోత్సవాలు, వైశాఖ సుద్ద చతుర్ధశి నాడు స్వామి జన్మ దిన వేడుకలను ఘనంగా నిర్వహిస్తారు. ప్రతి నెలా స్వాతి నక్షత్రం నాడు ప్రత్యేక పూజలు అలంకరణ చేస్తారు. 
ప్రతి శుక్రవారం మూల విరాట్టుకు పంచామృతాభిషేకం జరుగుతుంది. 
ధనుర్మాసంలో తిరుప్పావై గానం చేస్తారు, వైకుంఠ ఏకాదశి నాడు ఉత్తర ద్వార దర్శనం. 
భోగినాడు గోదా కల్యాణం. 
అన్ని పర్వదినాలలో విశేష పూజలు జరుపుతారు. 

ఉదయం ఆరు నుండి మధ్యాహాన్నం పన్నెండు తిరిగి సాయంత్రం నాలుగు నుండి రాత్రి ఎనిమిది వరకు తెరిచి ఉండే శ్రీ లక్ష్మీ నరసింహ స్వామి ఆలయం, గుంటూరు పట్టణంలోని రామచంద్ర అగ్రహారం ( R. agrahaaram)లో ఉన్నది.
బస్టాండు నుండి రైల్వే స్టేషన్ నుండి సులభంగా చేరుకొనవచ్చును.
గుంటూరు పట్టణంలోని దర్శనీయ క్షేత్రాలలో ఈ ఆలయం ఒకటి.
జై శ్రీ మన్నారాయణ !!!!


Sunday, December 21, 2014

Sri Lakshmi Narasimha Swamy Temple, Nakarikallu

                      శ్రీ లక్ష్మీ నారసింహ స్వామి ఆలయం, నకరికల్లు 

శ్రీ మహావిష్ణువు లోక కళ్యాణార్ధం ధరించిన అనేక అవతారాలలో నారసింహ అవతారం ప్రత్యేకమైనది. 
నర శరీరం సింహ శిరస్సుతో స్వామి ఆర్త రక్షకునిగానే కాకుండా సులభ ప్రసన్నునిగా అప మృత్యు భయాన్ని తొలిగించే వానిగా ప్రసిద్ది. 
నరసింహుని ఆలయాలు చాలా వరకు దక్షిణ ముఖంగా ఉంటాయి. దక్షిణ దిక్కు యమ స్థానం. 
తన భక్తులను యమ భాద పడకుండా కాపాడటానికే అన్నది భక్తుల నమ్మకం. 
మరో ముఖ్య విశేషం స్వామి ఆలయాలన్నీ కొండల మీద సహజ సిద్దంగా ఏర్పడిన గుహలలో ఉంటాయి. 
రూపం కూడా స్వయం ప్రకటిత రూపం. 
తదనంతర కాలంలో విగ్రహ ప్రతిష్టాపన జరిగినది. మిగిలిన ఆలయ భాగాల నిర్మాణం జరిగినట్లుగా చరిత్ర తెలుపుతుంది. 
అదే విధంగా నారసింహ ఆలయాలలో సుదర్శన చక్రానికి, శ్రీ ఆంజనేయునికి అధిక ప్రాధాన్యత లభిస్తుంది.
దగ్గరలో శివాలయం కూడా ఉండటం మరో ప్రత్యేకత.
నారసింహ ఆరాధన ఎక్కువగా మన రాష్ట్రంతో సహా తమిళనాడు, కర్నాటక మరియు తెలంగాణా రాష్ట్రాలలో కనపడుతుంది.
ఆంధ్రా మరియు తెలంగాణా లలో ఎన్నో పురాతన నారసింహ ఆలయాలు ఉన్నాయి.
ప్రముఖమైనవి కాకుండా మారుమూల గ్రామాలలో కూడా చరిత్ర ప్రసిద్ది చెందిన నారసింహ ఆలయాలు కనపడతాయి.

అలాంటి వాటిల్లో గుంటూరు జిల్లా నకరికల్లు గ్రామంలో ఉన్న శ్రీ లక్ష్మీ నారసింహ ఆలయం సుమారు ఆరువందల సంవత్సరాలకు పూర్వం నుండే నెలకొని ఉన్నదని తెలుస్తోంది.
ఊరికి చివర చిన్న కొండ మీద ఉండే ఈ ఆలయ చరిత్ర సంపూర్ణంగా అందుబాటులో లేకపోవడం విచారకరం.


ఇక్కడ స్వామి వారే కాదు శ్రీ చెంచు లక్ష్మి అమ్మవారు, శ్రీ మహా లక్ష్మి కూడా స్వయం ప్రకటిత మూర్తులుగా తెలుస్తోంది.
గర్భాలయంలో శ్రీ నారసింహ స్వామి కొలువు తీరివుండగా, ఇరువైపులా దేవేరులు వెలసి ఉంటారు.
చెంచు లక్ష్మి అమ్మవారు రూప రహితంగా శిలాకారంలో ఉండటం ఇక్కడి మరో అంశం.



గుట్ట మీదకు మెట్ల మార్గంలో వెళితే మొదట శ్రీ త్రిపురాంతక స్వామి ఆలయం దర్శనమిస్తుంది.
చిన్న గద్దె మీద శ్రీ గణపతి ఉపస్థితులై ఉంటారు.
శిధిల నంది, ద్వార పాలకులు అన్నీ కలిసి ఆలయం ఎంత పురాతనమైనదో తెలుపుతాయి.
ధ్వజస్తంభం వద్ద నిలబెట్టిన శిల ఒక శాసనం. దురదృష్ట వశాత్తు సున్నం వేయడం వలన అది పూర్తిగా కనుమరుగైనది.
శ్రీ\త్రిపురాంతక స్వామిని దర్శించుకొని ఇంకొంచెం ముందుకు వెళితే శ్రీ నారసింహ స్వామి ఆలయం కనపడుతుంది.
పునః నిర్మించిన ఆలయంలో పెద్దగా నిర్మాణ విశేషాలు లేకున్నా ఉత్తర ద్వారం ఉన్నది.
ధ్వజస్తంభం వద్ద ఒక శిలాశాసనం కొబ్బరి కాయలు కొట్టడానికి ఉపయోగిస్తున్నారు.
మరొకటి మాత్రం నిలబెట్ట బడినది.



అట్టహాసంగా ఆలయాలను పునఃనిర్మిస్తున్న వారు ఆలయ చరిత్రను తెలిపే అంశాల మీద కూడా దృష్టి పెట్టాల్సిన అవసరం ఎంతైనా ఉన్నది.
ఆలయానికి దక్షిణాన స్థానిక అవసరాల నిమిత్తం త్రవ్విన మంచి నీటి సరస్సు, చుట్టూ పచ్చని పొలాలు కళ్ళకు చక్కని ప్రకృతి విందు.









వంశపారంపర్యంగా అర్చకత్వం నిర్వహిస్తున్న శ్రీ రంగాచార్యులు గారు గ్రామ పంచాయితీ కార్యాలయ సమీపంలో నివసిస్తుంటారు.  


శ్రీ నారసింహ జయంతి, శ్రీ కృష్ణాష్టమి, శ్రీ రామ నవమి, ధనుర్మాస పూజలు, వైకుంఠ ఏకాదశి, భోగి నాడు గోదా కల్యాణం,శివరాత్రీ, నవ రాత్రులు వైభవంగా జరుపుతారు.
చారిత్రక విశేషాలు కలిగి వెలుగు లోనికి రాణి ఇలాంటి ఆలయాల అభివృద్దికి కృషి చేయాల్సిన అవసరం ఎంతైనా ఉన్నది. 
నమో నారసింహాయ నమః !!!!!