27, జూన్ 2018, బుధవారం

Sri Kalapathy vishwanatha Temple, Palakkad


       శ్రీ కలపతి విశ్వనాథ స్వామి ఆలయం, పాలక్కాడ్ 


పాలక్కాడ్ పట్టణం లోనే ఉన్న ఈ ఆలయం విశేష చరిత్రకు ప్రత్యక్ష సాక్షి. అంతే కాదు చుట్టుపక్కల ఉన్న ఆలయాల నిర్మాణాలకు  నాంది పలికించింనది  కూడా  ఈ ఆలయమే ! చరిత్ర దానికది తయారు కాదు. కొందరి చేత సృష్టించబడుతుంది. 



















అలా  సృష్టించింది శ్రీ వెంకటనారాయణ అయ్యర్, శ్రీమతి లక్ష్మీ అమ్మాళ్ దంపతులు. శివభక్తులైన ఈ దంపతులు వారణాసి వెళ్లి శ్రీ విశ్వేశ్వర స్వామిని, శ్రీ విశాలాక్షి అమ్మవార్లను దర్శించుకొని, తమ గ్రామంలో కూడా ఇలాంటి కైలాస పతి ఆలయం ఉండాలని నిర్ధారించుకున్నారు. తిరుగు ప్రయాణంలో కొన్ని శివలింగాలను, అమ్మవారి విగ్రహాలను తమ వెంట తెచ్చారు. 
వీరి స్వగ్రామం పాలక్కాడ్ కు  పాతిక కిలోమీటర్ల దూరంలో ఉన్న కొల్లెన్ గోడ్. ఇక్కడ ఒక అద్భుత శ్రీ మహావిష్ణువు ఆలయం ఉన్నది. ఈ దంపతులు పాలక్కాడ్ పాలకుడైన "ఇత్తికంబి అచ్చన్" వద్దకు వెళ్లి పట్టణం పక్కగా ప్రవహించే పవిత్ర నీలా నది ఒడ్డున గంగాధరుని, అమ్మవారిని ప్రతిష్టించమని అర్ధించారు. కొంత ధనం విరాళంగా కూడా ఇచ్చారు. దైవభక్తి పరాయణుడైన రాజు ఆలయం నిర్మించడమే కాకుండా భూరి భూదానం ఆలయ నిర్వహణ నిమిత్తం సమర్పించుకున్నాడు. దంపతులు ఇచ్చిన ధనంతో ఒక నిధిని ఏర్పాటు చేసి దానితో ప్రధాన ఉత్సవాలను నిర్వహించమని శాసనం చేసాడు. ఈ శాసనాన్ని ఆలయ ధ్వజస్థంభం వద్ద చూడవచ్చును. 





















ఈ ఉదంతం జరిగింది పదిహేనో శతాబ్దంలో అన్నది చరిత్రకారుల అంచనా ! ఎందుకంటే పై శాసనకాలం 1424 వ సంవత్సరం. ఈ ఆలయం గురించిన సమగ్ర సమాచారం ఆంగ్ల చరిత్రకారుడు రాబర్ట్ సెవెల్ 1882వ సంవత్సరంలో రాసిన పుస్తకంలో ఉన్నట్లుగా తెలుస్తోంది. ఈ పుస్తకంలో కేరళ, తమిళనాడు రాష్ట్రాలలోని ఎన్నో పురాతన ఆలయాల వివరాలున్నాయి అని అంటారు. 
శ్రీ వెంకటనారాయణ దంపతులు తమతో తెచ్చిన మిగిలిన మూడు లింగాలను కొల్లెన్ గోడ్, కొడువయూర్ మరియు పొక్కున్ని అనే గ్రామాలలో ప్రతిష్టించారు. కారణమేమిటో తెలియదు కానీ ఈ నాలుగు లింగాలు నాటి సంఘం లోని బ్రాహ్మణ, క్షత్రియ, వైశ్య మరియు శూద్ర అనే నాలుగు కులాలకు ప్రతీకలుగా పరిగణిస్తారు. పాలక్కాడ్ లో ఉన్నది వైశ్య లింగం. దానికి తగినట్లే స్థానిక వ్యాపార వర్గాల వారు స్వామిని పూజించి కానీ ఏ కార్యక్రమం ఆరంభించక పోవడం గమనించదగిన అంశం.












అదలా ఉంచితే పాలక్కాడ్ శ్రీ విశ్వనాథ స్వామి ఆలయానికి, కాశీ విశ్వేశ్వర స్వామి ఆలయానికి పేరు దగ్గర నుండి కొన్ని పోలికలుండటం విశేషం. ముక్తి క్షేత్రమైన వారణాసిలో గంగా తీరంలో స్వామి కొలువు దీరారు.ఇక్కడ కాశీ నుండి తెచ్చిన లింగాన్ని నీలా నది ఒడ్డున ప్రతిష్టించారు. అక్కడా ఇక్కడా గతించిన పితృ దేవతలకు సద్గతులు కలగాలని అస్థి నిమజ్జనం, పిండ ప్రధాన కార్యక్రమాలు నిర్వహిస్తారు. అభిషేకాలు, అర్చనలు, ఆరాధనలు నియమంగా నిర్వహిస్తారు.    
మైసూరు పాలకుడైన టిప్పు సుల్తాన్ ఈ ప్రాంతం మీద దండయాత్ర చేసిన సమయంలో ఈ ఆలయాన్ని ధ్వంసం చేయ తలపెట్టాడట. కానీ స్థానిక ప్రజల ప్రతిఘటనతో ఆగిపోయాడట.
పాలక్కాడ్ తమిళనాడు రాష్ట్ర సరిహద్దు ప్రాంతం కావడం, చాలాకాలం తమిళనాడులో భాగంగా ఉండటం వలన గతం నుండి ఇక్కడ తమిళుల ఆచారవ్యవహారాల ప్రభావం ఎక్కువగా ఉండటం వలన ఈ ఊరిలోని చాలా ఆలయాలలో తమిళ ఆగమాల ప్రకారం పూజా విధులు నిర్వర్తిస్తారు. శ్రీ విశ్వనాథ స్వామి ఆలయంలో కూడా అంతే ! మగవారు చొక్కా విప్పనక్కర లేదు.






















ఆలయం చుట్టూ బ్రాహ్మణ అగ్రహారాలుంటాయి.  రహదారి నుండి క్రిందకి విశాలమైన ప్రాంగణంలో కేరళ మరియు ద్రావిడ నిర్మాణంలో ఉంటుందీ ఆలయం. తూర్పు ద్వారం వద్ద శ్రీ క్షిప్ర ప్రసాద మహా  గణపతికి ఒక ప్రత్యేక ఆలయం నిర్మించబడినది. తొలి పూజ ఆయనకే !
ధ్వజస్థంభం, బలిపీఠాలు నంది (జ్ఞాన నందీశ్వరుడు అని పిలుస్తారు)పీఠం శాసనం దాటి మండపం గుండా లోనికి వెళితే శ్రీ వినాయక, శ్రీ షణ్ముఖ మరియు శ్రీ విశాలాక్షీ అమ్మవార్లు  విడివిడిగా తమ తమ సన్నిధులలో కొలువై ఉంటారు. గర్భాలయంలో శ్రీ కాశీ విశ్వనాధ స్వామి లింగ రూపంలో చందాన, కుంకుమ, విభూది లేపనాలతో, రమణీయ పుష్పాలంకరణలో నయనమనోహరంగా దర్శనమిస్తారు.
నియమంగా రోజుకి మూడు పూజలు జరుగుతాయి. ప్రదక్షిణాపధంలో అశ్వద్ధ వృక్షం, చుట్టూ నాగ ప్రతిష్ఠలు కనపడతాయి. ఈ ఆలయ వృక్షం అశ్వద్ధమే ! ఈ క్షేత్రం రాహుకేతు పూజలకు ప్రసిద్ధి. సంతానం లేని దంపతులు, నాగ దోషంతో వివాహం కానీ యువతీ యువకులు ఇక్కడ ప్రత్యేక పూజలు చేస్తుంటారు. అవసరమైన వారు నాగప్రతిష్ఠలు చేస్తారు.
ఉదయం ఐదున్నర గంటలకు తెరిచే ఆలయం తిరిగి మధ్యహన్నం  పన్నెండు గంటలకు మూసివేస్తారు. సాయంత్రం నాలుగు గంటల నుండి రాత్రి ఎనిమిది గంటల దాకా తెరచి ఉంటుంది. అన్ని హిందూ పర్వదినాలలో విశేష పూజలు జరుపుతారు. మహాశివరాత్రి పర్వదినాన్ని ఘనంగా అయిదు రోజుల పాటు నిర్వహిస్తారు. ఆఖరి రోజున జరిగే రధోత్సవం కేరళలోని మరే ఆలయంలోనూ అంత గొప్పగా జరగదు. లక్షలాదిగా భక్తులు తరలి వస్తారు.
చూడవలసిన ఉత్సవం. పాలక్కాడ్ పట్టణ చుట్టుపక్కల, జిల్లాలో ఎన్నో విశేష ఆలయాలు ఉన్నాయి.

నమః శివాయ !!!!

25, జూన్ 2018, సోమవారం

Malampuzha Dam






                          మనోహరం మళంపుళ ఆనకట్ట 

                                                                                              

నేను కేరళ రాష్ట్రం లోని చాలా జిల్లాలలోని దర్శనీయ స్థలాలను సందర్శించాను. అస్సలు చూడని జిల్లాలు పాలక్కాడ్, కాసర్గోడ్ మరియు వేనాడ్. ఈ జూన్ మొదటి వారంలో నేను ఆఫీసు పని మీద త్రిసూర్ వెళ్లాల్సివచ్చింది.   నా మిత్రులు శ్రీ ఏకా ప్రసాదు, శ్రీ దాసరి ప్రసాదు కూడా నాతొ వచ్చారు. వారిద్దరి ప్రయాణం క్షేత్ర దర్శనం కోసమే ! త్రిసూరులో శ్రీ వడక్కు నాథర్, తిరువంబాడి శ్రీ కృష్ణ  ఆలయాలను దర్శించుకొని, గురువాయూర్ వెళ్ళాము. గురువాయూరప్పన్ ను సేవించుకొన్నాము.  పని పూర్తి అయిన తరువాత రెండో రోజు సాయంత్రం పాలక్కాడ్ చేరుకున్నాము. 

















నా దగ్గర ఉన్న సమాచారం ప్రకారం ఊరిలో ఉన్న శ్రీ కలపాతి విశ్వనాథ ఆలయం, టిప్పు సుల్తాన్ కోట కాకుండా డెబ్భై కిలోమీటర్ల దూరంలో ఉన్న సైలెంట్ వ్యాలీ పార్క్ మాత్రమే చూడదగినవి. అలానే మాకున్న సమయం ఒక రోజు మాత్రమే ! అది కూడా ఆదివారం కావడాన ! ఆదివారం రాత్రికి కోయంబత్తూర్ చేరుకోవాలి. సోమవారం అక్కడ నేను ఒక సమావేశంలో పాల్గొనాలి. ఇంకా ఖచ్చితంగా చెప్పాలంటే ఉన్నసమయం పన్నెండు గంటలు అంతే. అందువలన దూరంగా ఉన్న సైలెంట్ వ్యాలీని తీసేసాము. 
పాలక్కాడ్ జంక్షన్ వద్ద కొత్తగా పెట్టిన న్యూ నమస్కారం లాడ్జి కి వెళ్ళాము. అక్కడ మేనేజర్ "అస్లం"మాతో ఇంగ్లీషులో మాట్లాడి రూమ్ చూపించారు. ఒకరోజు ఉండటానికి సరిపోతుంది. శుభ్రంగా బాగానే ఉన్నది. అతనికి నా ఆధార్ కార్డు ఇచ్చి మేము తెలుగులో మాట్లాడు కొంటున్నాము. అప్పటి దాకా ఆంగ్లంలో మాట్లాడిన అస్లం హఠాత్తుగా "మీరు ఆంధ్రా నుండి వచ్చారా ?" అన్నాడు తెలుగులో. 



















మేము ఆశ్చర్యపోయాము. వారి స్వగ్రామం తూర్పు గోదావరి జిల్లాట! అర్ధ శతాబ్దం క్రిందట వారి తండ్రి రైల్వేలో  ఉద్యోగ నిమిత్తం ఇక్కడికి వచ్చి స్థిరపడిపోయారట. ఇంట్లో తెలుగే మాట్లాడు కొంటారట.ఆనందం వేసింది. అతను మాకు కొన్ని ఆలయాల గురించిన సమాచారం ఇస్తూ మళంపుళ ఆనకట్ట గురించి చెప్పారు. పాలక్కాడ్ నుండి పది కిలోమీటర్ల దూరమే ! బస్సులు కూడా విరివిగా లభిస్తాయి జంక్షన్ స్టేషన్ నుంచి ! 
కానీ టైం తక్కువగా ఉండటం వలన అతనే ఒక తెలిసిన ఆటో మాట్లాడి పెట్టాడు. విశ్వనాధ ఆలయం, టిప్పు సుల్తాన్ కోట చూపించి మళంపుళ దగ్గర వదిలేస్తాడు. మూడు వందలు. ఓకె అనుకొన్నాము. 


ఉదయాన్నే ఏడు గంటలకు బయలుదేరి కలపాతి శ్రీ విశ్వనాథ స్వామి ఆలయం చేరుకున్నాము.ఋతుపవనాలు వారం క్రిందటే కేరళలో ప్రవేశించాయి. కానీ ఇప్పుడు వర్షం లేదు.మబ్బు ఎండా, వేడి, చల్లదనం కానీ వాతావరణం నెలకొని ఉన్నది.  























శ్రీ కలపాతి విశ్వనాధ స్వామి ఆలయం 

నీలా నది ఒడ్డున ఉండే ఈ ఆలయం పాలక్కాడ్ పట్టణానికి ఒక ప్రత్యేక గుర్తింపు తెచ్చింది. పదిహేనో శతాబ్దంలో నిర్మించబడిన ఈ ఆలయం గురించి ఆంగ్లేయులు పూర్తి సమాచారాన్ని సేకరించి గ్రంధస్థం చేసినట్లుగా తెలుస్తోంది.  
శ్రీ వెంకటనారాయణ అయ్యర్ దంపతులు వారణాశి నుండి తీసుకొని వచ్చిన లింగాన్ని అప్పటి పాలక్కాడ్ పాలకుడు "ఇట్టి కొంబి అచ్చన్" ఇక్కడ ప్రతిష్టించి, చుట్టుపక్కల గ్రామాలను ఆలయ నిర్వహణ నిమిత్తం రాసి ఇచ్చారట ! ఈ సమాచారాన్ని ధ్వజస్థంభం దగ్గర ఉన్న శిలాశాసనం తెలుపుతుంది.మళయాళ దేశంలో ఉన్నా తమిళ ఆగమ శాస్త్రాల ప్రకారం పూజలు జరుగుతాయి. పూజారులు కూడా తమిళులే !స్థానికులకు ఈ ఆలయం వారణాసితో సమానం. నీలా నది ఒడ్డున గతించిన పితృదేవతలకు పిండ ప్రదానం చేస్తారు. 
మహాశివరాత్రి రధోత్సవం కేరళ రాష్ట్రంలో మరెక్కడా అంత వైభవంగా జరగదట. లక్షలాది మంది భక్తులు వస్తారట. గణపతి, షణ్ముఖుని, శ్రీ విశాలాక్షీ సమేత శ్రీ కాశీ విశ్వనాధ స్వామిని దర్శించుకొని రెండో గమ్యం అయిన టిప్పు సుల్తాన్ కోటకు బయలుదేరాము. (ఈ ఆలయ పూర్తి వివరాలు ఈ బ్లాగ్ లో ఉన్నాయి. )


























టిప్పుసుల్తాన్ కోట 

పేరుకే ఇది టిప్పు సుల్తాన్ కోట ! ఆయన కట్టించ లేదు. ఒక్కసారి మాత్రమే వచ్చారట. స్థానిక పాలకుడు "పాళియత్ అచ్చన్" జొమారిన్ రాజులకు సామంతుడు. వారు బలహీనపడుతున్న సమయంలో ఇతను తిరుగుబాటు చేసి స్వతంత్రం ప్రకటించుకొన్నాడట. ధిక్కారాన్ని సహించని జొమారిన్ చక్రవర్తి పాలక్కాడ్ మీద దండయాత్ర ప్రకటించాడట. చక్రవర్తి సైన్యం ముందు నిలబడలేనని తెలుసుకొన్న అచ్చన్ మైసూరు పాలకుడైన "హైదర్ ఆలీ"(టిప్పు సుల్తాన్ తండ్రి)ని సహాయం అర్ధించాడట.  ఎప్పటి నుండో ఈ ప్రాంతం మీద కన్నేసి ఉన్న హైదర్ ఆలి వెంటనే తన సేనలను పాలక్కాడ్ పంపారట. యుద్ధంలో గెలిచిన తరువాత హైదర్ ఆలి 1766వ సంవత్సరంలో ఒక కోటను నిర్మింప  తలిచాడట. కానీ నిరంతరం ఆంగ్లేయులతో పోరాడాల్సిన పరిస్థితులు ఉండటం వలన వ్యూహాత్మకంగా కీలక ప్రాంతమైన పాలక్కాడును కాపాడటానికి తాత్కాలికంగా ఈ కోటను నిర్మించాడట. పెద్ద కోటను నిర్మించడానికి తెప్పించిన రాళ్లను చూపించాడు అక్కడి గైడు.చాలా కాలం జరిగిన పోరాటాల తరువాత 1790వ సంవత్సరంలో కోట పూర్తిగా ఆంగ్లేయుల పరం అయ్యింది. 
















ప్రస్తుతం పురావస్తు శాఖవారి అధీనంలో ఉన్న కోట చుట్టూ పటిష్టమైన, ఎత్తైన గోడలు, నాలుగు మూలాల బురుజులు, చుట్టూ రక్షణ నిమిత్తం తవ్విన లోతైన కందకం. లోపల ఉన్న పురాతన గృహాలను పటిష్ట పరచి జిల్లా కేంద్ర చెఱసాలగా మార్చారు.కందకంపక్కన చక్కని ఉద్యానవనాన్ని, పిల్లలు ఆడుకోటానికి కావలసిన వస్తువులను అమర్చారు. ప్రవేశ ద్వారం గుండా లోపలి ప్రవేశిస్తే తొలుత అంజనా సుతుని ఆలయం కనిపిస్తుంది. నిత్యం ఎందరో భక్తులు వస్తుంటారు. (ఈ కోట పూర్తి వివరాలు ఈ బ్లాగ్ లో ఉన్నాయి)
పార్కు, కోట పైభాగం, బురుజులు ఎక్కాము.నేటికీ చెక్కు చెదరని నాణ్యత గల నాటి నిర్మాణాలు అబ్బురపరిచాయి. కోట లోనికి ప్రవేశం ఉచితం. ఫోటోలు తీసుకోవచ్చును. మూసివేసిన తినుబండారాల మరియు ఆట వస్తువుల దుకాణాలు ఇక్కడికి సందర్శకులు ఎక్కువగానే వస్తుంటారన్న విషయాన్ని తెలిపాయి. 
మా తదుపరి గమ్యం మళంపుళ ఆనకట్ట.  అరగంటలో చేరిపోయాము. 




























మళంపుళ ఆనకట్ట 

దూరానికి ఎత్తుగా ఠీవిగా కనపడుతోంది ఆనకట్ట. ప్రవేశద్వారం వద్ద నుండి ఆనకట్ట దాక చక్కని ఉద్యానవనాన్ని ఏర్పాటు చేశారు. వెలుపల, హోటళ్లు, తినుబండారాలు అమ్మే బళ్ళు, టీ దుకాణాలు చాలానే ఉన్నాయి. స్నేక్ పార్కు, రాక్ గార్డెన్, ఫాంటసీ పార్క్, సిఱువాణి ఆనకట్ట, ఆర్ట్ గ్యాలరీ, ఆక్వేరియం, బోటింగ్, రోప్ వే లాంటివి చాలా ఈ ప్రాంతంలో ఉన్నాయి అన్నది అక్కడ ఉన్న బోర్డులు చూసిన తరువాత అర్ధమయ్యింది. 
ముందుగా స్నేక్ పార్క్ చూడాలని నిర్ణయించుకొన్నాము. మనిషికి ఇరవై రూపాయలు. వృధా కాదు. కింగ్ కోబ్రా దాకా ఎన్నో రకాల పాములను చూడవచ్చును, ఎన్నో కొత్త విషయాలను సర్పాల గురించి తెలుసుకోవచ్చును. తరువాత రోప్ వే ఎక్కి పార్క్ మొత్తం గగన వీక్షణం చేసాము. చక్కగా నిర్వహిస్తున్నారు. 
మనిషికి పాతిక రూపాయల టికెట్టు కొనుక్కొని లోపలి ప్రవేశించాము. నలుదిక్కులా చక్కగా క్రమపద్ధతిలో పెంచిన మొక్కలు. కొన్ని పూలతో, మరికొన్ని రంగురంగుల ఆకులతో తమ సోయగాన్ని ప్రకటిస్తున్నాయి. గతంలో పిల్లల కోసం చిన్న రైలు నడిపేవారేమో ప్రస్తుతం పాడై పోయింది. పార్క్ లో ఉన్న ఆకర్షణలు ఎటుపక్క ఉన్నాయి అన్న వివరాలతో కూడిన సూచికలు అక్కడక్కడా అమర్చారు. మేము ముందు రోప్ వే లో కూర్చొని చూసినదాని ప్రకారం యక్షిణీ బొమ్మ, జపాన్ గార్డెన్స్, బోట్ రైడ్, వాటర్ ఫౌంటైన్, హంగింగ్ బ్రిడ్జ్  ఇలా అన్నీ చూసుకొంటూ ఆనకట్ట పైభాగానికి మెట్ల మార్గంలో చేరుకున్నాము. 
సుమారు రెండు కిలోమీటర్ల పొడవు నాలుగు వందల అడుగుల ఎత్తుతో ఉండే ఈ ఆనకట్టను, కేరళలో రెండవ అతి పెద్ద నది అయిన భరత్ పుళ కు ఉపనది అయిన "మళం పుళ" మీద 1955వ సంవత్సరంలో ప్రారంభించారు. నది పేరే ఆనకట్టకు పెట్టారు. దీని వలన సుమారు యాభై వేల ఎకరాలకు సాగునీరు, పాలక్కాడ్ పట్టణంతో పాటు అనేక ప్రాంతాలకు త్రాగునీరు లభిస్తుంది. అప్పట్లో పాలక్కాడు మద్రాసు రాష్ట్రం క్రింద ఉండేదట. 


























































































ఆనకట్ట కు ఒక వైపున నీరు, దూరంగా మేఘాల దుప్పటి కప్పుకొన్న పచ్చని పర్వతాలు, మరో వైపున చక్కని ఉద్యానవనం. కన్నులకు గొప్ప ప్రకృతి విందు. మనస్సుకు ఆహ్లాదం. చాలా మనోహరంగా ఉన్నది దృశ్యం. కెమెరాలకు పని చెప్పాము.మా మాదిరి అక్కడికి వచ్చిన అందరూ చేస్తున్నది అదే ! 
నీటి మీదగా సాగుతూ చల్లగా తగిలే గాలి, కనుల ముందు పరవశింపచేసే దృశ్యాలు. అప్పటి దాకా నడక వలన కలిగిన అలసట ఎటుపోయిందో ? కదల బుద్ది కాలేదు. అలా చూస్తుండి పోయాము కొంతసేపు. కాలం మన చేతుల్లో లేదు కదా ! మధ్యాహన్నం రెండు గంటలు. క్రిందకి దిగి నడుచుకొంటూ పార్క్ వెలుపలికి వచ్చాము. ఎదురుగా ఉన్న హోటల్లో టిఫిన్ తిని, బస్సు ఎక్కి పాలక్కాడ్ కు బయలుదేరాము. 
కుటుంబాలతో కేరళ విహార యాత్రకు వెళ్లే వారందరికీ నాది ఒక సలహా ! కొల్లం, కొచ్చిన్, గురువాయూర్, తిరువనంతపురం, మున్నారు ఇవే కాదు కేరళ అంటే ! పాలక్కాడ్ లాంటివి కూడా ఎన్నో ఆకర్షించే ఆకర్షణలు కలిగి వున్నాయి.వాటిని కూడా మీ జాబితాలో కలుపుకోండి. మనోహరమైన ఆనందాన్ని సొంతం చేసుకోండి. 


Sri Villiputtur

                                        శ్రీ విల్లిపుత్తూరు   తమిళనాడులోని ఆలయాల లేదా ఊరి పేర్లు అతి తక్కువగా శ్రీ తో ప్రారంభం అవు...