9, జూన్ 2018, శనివారం

Techhikottukavu Ramachandran

                                  తెచ్చికొట్టుకావు రామచంద్రన్ 





ఒక ఏనుగుగా జన్మించి లక్షలాది ప్రజల ఆదరాభిమాలను సంపాందించుకొన్నది తెచ్చికొట్టుకావు రామచంద్రన్. 
త్రిసూర్ దగ్గరలోని పేరమంగళం గ్రామంలోని శ్రీ భగవతీ అమ్మవారి ఆలయం చాలా ప్రసిద్ధి. ఆ దేవస్థానం యొక్క గజరాజే ఈ రామచంద్రన్ !
కేరళ ప్రజలకు ఏనుగులతో శతాబ్దాలుగా ఒక అవినాభావ సంబంధం ఏర్పడినది. ఏనుగు వారి సంస్కృతి సంబరాలలో ఒక భాగం. ఏనుగు లేని ఉత్సవాన్ని వారు ఆదరించరు. అందుకే ప్రముఖ ఆలయాలలో ఏనుగు తప్పని సరిగా ఉంటుంది. అదే విధంగా ఎందరో పెంపకందారులు ఏనుగులను అద్దెకు ఇస్తుంటారు. ఒక్క ఏనుగుకు ఉన్న పేరుప్రతిష్టలను బట్టి దాని రోజు అద్దె ఉంటుంది. అది లక్ష నుండి రెండున్నర లక్షల దాకా ఉంటుంది అని అంటారు. కేరళ రాష్ట్రంలో సుమారు మూడు వందల పైచిలుకు ఏనుగులు పెంపకందారుల వద్ద ఉన్నాయి అంటే ఎంత డిమాండ్ ఉన్నదో ఊహించవచ్చును. రాష్ట్రంలోని ఆలయాలలో రెండువందల దాక ఏనుగులుంటాయి. వాటిల్లో అగ్రస్థానం గురువాయూరు దేవస్థానానిదే ! ఆ దేవస్థానానికి అరవై ఏనుగులున్నాయి. అవన్నీ కూడా భక్తులు తమ ఆరాధ్య దైవం శ్రీ గురువాయూరప్పన్ కి కానుకగా సమర్పించుకొన్నవే కావడం విశేషం ! వీటిని ప్రత్యేకంగా పునత్తూరు కోట అనే పది ఎకరాల స్థలంలో ఉంచారు. వీటిల్లో దివంగత తమిళనాడు మాజీ ముఖ్యమంత్రి కుమారి జయలలిత, ప్రముఖ నటుడు సురేష్ గోపి ఇచ్చిన ఏనుగులు కూడా ఉన్నాయి. 
   




దేవదాసు (ఆలయ రెండో ఏనుగు)








ఈ ఉపోద్ఘాతం అంతా మలయాళీలకు గజాల పట్ల గల అభిమానాన్ని తెలియజేయడానికే ! ఇక మన కధానాయకుడు రామచంద్రన్ విషయానికి వద్దాము.  1964లో బీహారులో జన్మించాడు.  యజమాని పెట్టిన పేరు "మోతీ ప్రసాద్". 1982వ సంవత్సరంలో కేరళకు చెందిన వేంకటాద్రి అనే ఆయన మోతీ ప్రసాదును కొని తీసుకొని వచ్చాడు. ఆయన దానికి తన ఇష్టదైవమైన వినాయకుని మీద భక్తితో  " గణేష్" అని కొత్త పేరు పెట్టాడు. కొత్త ప్రాంతం, కొత్త పేరు, అర్ధం కాని భాష. ఇవన్నీ మోతీ ప్రసాద్ ను అయోమయానికి గురి చేసాయి. అతను లొంగక పోవడంతో వెంకటాద్రి అమ్మకానికి పెట్టాడు. ఆలయ ఏనుగుకు ఉండవలసిన లక్షణాలు సంపూర్ణంగా కలిగి ఉండటంతో తెచ్చికొట్టుకావు శ్రీ భగవతీ అమ్మవారి దేవస్థానం వారు ఖరీదు చేశారు.
ఇది మోతీ ప్రసాద్ జీవితాన్ని అనేక మలుపులు తిప్పింది.  దేవస్థానం వారు "రామచంద్రన్" అని కొత్త పేరు పెట్టారు. పద్దెనిమిది సంవత్సరాలుగా పిలుస్తున్న పేరుతొ కాకుండా రకరకాల పేర్లతో పిలవడం ఇబ్బంది పెట్టసాగింది. అంతే కాకుండా హిందీ మరియు భోజపురి తప్ప మరో భాష అర్ధం కాని మోతీ ప్రసాదు కు మలయాళము మరింత గందరగోళ పరచింది. ఇదంతా కలిసి అతనికి ఒక విధమైన దురుసు ప్రవర్తన నేర్పింది. దానితో మావటి మాట వినక పోవడం, అదుపు తప్పడం చేయసాగాడు. విసుగెత్తిన మావటి ఒక నాడు ఉచితానుచితాలు మరిచిపోయి కొట్టాడు. ఒక దెబ్బ ఎడమ కంటి మీద తగిలి దృష్టిని కోల్పోయింది. అలా మావటి దౌర్జన్యానికి గురి కావడం ద్వారా తొలిసారి రామచంద్రన్ ప్రజలకు పరిచయమయ్యాడు.





  







తరువాత ఎన్నోసార్లు వార్తల లో ప్రముఖంగా నిలిచాడు రామచంద్రన్. నెమ్మదిగా భాష అర్ధం చేసుకోవడం, మావటి సూచనలను పాటించడం లాంటివి తెలుసుకొన్నా, చూపులకు శాంత గంభీర మూర్తిలా కనిపించినా  రామచంద్రన్ ఒక ప్రమాదకర ఏనుగు అన్నముద్ర మాత్రం తొలగించుకోలేక పోగా దాన్ని నిరూపించే పనులను చేసాడు. ఎడమ కంటిని కోల్పోవడంతో  అటు పక్క చూడలేక పోయేవాడు రామచంద్రన్ ! దానితో అటు పక్కన చిన్న అలికిడి, చప్పుడు లేదా కదలిక ఏర్పడినా బెదిరిపోయేవాడు. అదుపు తప్పేవాడు. అలా తొలిసారి ఎడమ పక్కన కాల్చిన టపాకాయల శబ్దానికి బెదరి పరిగెత్తే క్రమంలో ఒక బాలుని మరణానికి కారణమయ్యాడు. ఇది జరిగింది పాలక్కాడ్ ఆలయ ఉత్సవ సందర్భంలో ! తరువాత ఎర్నాకుళంలోని శ్రీ సుబ్రమణ్య ఆలయ ఉత్సవం సమయంలో ఇలానే అదుపుతప్పి ముగ్గురు మహిళల మరణానికి కారణమయ్యాడు. ఇవే కాదు తనను అదుపుచేసే ఇద్దరు మావటీల చావుకు కారణమయ్యాడు రామచంద్రన్ ! వీటన్నిటి కన్నా ముందు సాటి గజరాజును చంపాడు.కేరళ రాష్ట్రంలో అత్యంత ప్రసిద్ధి చెందిన ఉత్సవం త్రిసూర్ పూరం. లక్షలాదిగా భక్తులు పాల్గొంటారు. ఆ రోజున రాష్ట్రంలోని ప్రముఖ గజాలు రెండు జట్లుగా విడిపోయి చేసే విన్యాసాలు చూడవలసినదే! ఆ పూరంలో పాల్గొన్న రామచంద్రన్ శబ్దాలకు బెదిరి మరో ప్రముఖ గజరాజైన తిరువంబాడి చంద్రశేఖర్ను తన దంతాలతో పొడిచి చంపింది. 
ఇలా రామచంద్రన్ పదకొండు మంది మరియు ఒక ఏనుగు మరణానికి కారణం అని చెబుతారు. 






దేవదాసు 






వీటి మూలాన తొలిసారిగా పోలీసుల చేత అదుపులోనికి తీసుకోబడిన ఏనుగుగా, తొలిసారిగా జామీను పొందిన ఏనుగుగా రామచంద్రన్ పేరొందాడు. అయినా ఇవేవీ ప్రజలలో అతని పట్ల గల అభిమానాన్ని తగ్గించలేకపోయాయి. 
ఆసియాలో ఎత్తైన (సుమారు పదకొండు అడుగులు) గజరాజుగా, చూడగానే ఆకర్షించే ఆకారంతో రామచంద్రన్ ఎవరినైనా ఇట్టే ఆకట్టుకొంటాడు. 
పూరం సందర్బంగా మాత్రమే తెరిచే త్రిసూర్ శ్రీ వడక్కునాథర్ ఆలయ దక్షిణ ద్వారం గుండా ఉత్సవ మూర్తిని తీసుకొని రామచంద్రన్ వెలుపలికి రాగానే ప్రజలు చేసే హర్షధ్వానాలు అందుకు నిదర్శనం. 
చోటు చేసుకున్నమరణాలలో రామచంద్రన్ తప్పు ఏమున్నది ? అని ప్రశ్నిస్తారు జంతు ప్రేమికులు. మావటి క్రూరత్వానికి బలైన మూగ జీవిలో సహజంగానే చోటుచేసుకొనే భయాందోళనలను తగ్గించే ప్రయత్నం చేయకుండా మరింత భయపెట్టిన పరిస్థితులను కల్పించడమే అసలు కారణం అని వారంటారు. 
రామచంద్రన్ ఏ ఆలయ ఉత్సవంలో పాల్గొన్నా లక్షలాదిగా ప్రజలు వారితో పాటు పోలీసులు మరియు మత్తు మందు నింపిన తుపాకీలను పట్టుకొని అటవీ శాఖ అధికారులు హాజరవుతారు. ఎందుకంటె రామచంద్రన్ ఎప్పుడు బెదిరి అదుపు తప్పుతాడో తెలీదు కనుక !
నేను మొదటి సారి రామచంద్రన్ గురించి విన్నది 2012లో ! చూసింది 2014లో ! రామచంద్రన్ మీద రాసిన నా వ్యాసం ఆంధ్రజ్యోతి ఆదివారం పుస్తకంలో ప్రచురించబడింది. తిరిగి ఈ సంవత్సరం మే 31న మరో సారి రామచంద్రన్ ను చూసే అవకాశం లభించినది. వృధాప్యం తాలూకు ఛాయలు ప్రస్ఫుటంగా కనిపించాయి. (ఏనుగుల జీవన కాలం 70 సంవత్సరాలు అని అంటారు ) క్రిందటి సారి చూసినప్పుడు కనిపించిన పొగరు(?) ఈ సారి కనిపించ లేదు. నిదానంగా ఉన్నాడు. కంటి ముందు మనుషులు తిరగాడుతున్నా పెద్దగా ప్రతిస్పందన లేదు. తనమానాన తాను నెమరువేస్తూ కనిపించాడు. దానికి నిదర్శనం నేను తీసుకొన్న స్వయం చిత్రమే ( selfie). 
ఆలయాల తరువాత పక్షులు, ఏనుగులు అంటే నాకెంతో ఇష్టం. ఆ ఇష్టమే రెండు సార్లు రామచంద్రన్ వద్దకు వెళ్లేట్టు చేసింది. అదే రోజు గురువాయూర్ ఆలయ గజశాల అయిన పునత్తూరు కోట మూడో సారి దర్శించుకొన్నాను. 
లక్షలాది మంది అభిమానాన్ని చూరగొన్న రామచంద్రన్ కి ఆ భగవంతుడు సంపూర్ణ ఆయుర్దాయాన్ని ప్రసాదించాలని ప్రార్ధిస్తూ !!!!!!!!!!
  






Saptha mangai Sthalams

        నవరాత్రులతో ముడిపడి ఉన్న సప్త మాంగై స్థలాలు                                                                                   ...